LEGAZPI CITY — Mago-ofrecir nin libreng sakay an Land Transportation, Franchising and Regulatory Board (LTFRB) Bicol para sa mga commuters na piglalaomang maapektaran kan ilulunsar na transport strike sa aga, Oktubre 16 kan grupong CONDOR Piston Bicol.
Sa intrevista kan Bombo Radyo Legazpi ki LTFRB Bicol Director Vladimir Cahulugan, nakipag-olay na an ahensya sa nagkapirang bus operators para sa lakdang.
Aminado man an opisyal na nariribong na sa kamawotan kan nasa transport sector urog na inaprubahan naman an pighahagad na pagbabalik kan P8 na regular fare mantang tinawang-duon na wara man mababasol sa pagsakat kan presyo kan nagkapirang petrolyo sa lokalidad.
Pag-eksplikar kan opisyal na naghihiro an presyo sa world market mantang nagkakaigwa man nin paminsan-minsang rollback sa oil prices.
Sa ibong na lado, nagpatanid man an opisyal sa mga masarabay sa welga na posibleng makansela an prangkisa urog na kun warang permit asin magkaigwa nin kariribukan huli sa aktibidad.
Mientras tanto, nagpagirumdom man an opisyal sa mga drayber na dae pa nagkukua kan fuel subsidy cards na hasta ngonian na Oktubre na sana an release kaini mantang ipapadagos na sana sa masunod na taon.
Napag-araman na nasa 6, 400 an naka-alocar na cards para sa mga driver sa Bicol sa irarom kan nasabing programa.
