LEGAZPI CITY- Nanindugan an Land Transportation Franchising and Regulatory Board Bicol na magpapadagos an modernisasyon.
Ini an sa tahaw kan petisyon kan Senado na paramientras na suspinderon an public utility vehicle modernization program.
Segun ki LTFRB Bicol Director Joel Defeo sa intrevista kan Bombo Radyo Legazpi na nasa 90% an consolidation rate sa rehiyon asin dakol na man an mga consolidated units na nagba-biyahe sa manlain lain na provincia.
An natatadang 10% suboot an dae na nagabiyahe huli ta binutasan na an prangkisa asin an iba man an nagre-repair kan saindang mga units.
Aminado man an opisyal na dakol na mga kooperatiba sa Bicol an nadismaya sa lakdang kan Senado.
Marurumduman na sa nakalihis na transport summit na ginibo sa Sorsogon, nagpaluwas man nin hinaing an mga grupo nin transportasyon huli ta bako suboot napapanahon an nasabing suspensyon sa programa.
Dugang pa ni Defeo na nasa kabilugan na P7.5 billion na an nagastos na pondo kan gobierno.
Mientras tanto, bilang pakikisumaro kan rehiyon sa unity walk kan ibang mga provincia, naglatag man an mga korporasyon nin mga banners sa mga terminals na may nakalaag na ‘Solusyon, hindi suspensyon.’
