LEGAZPI CITY — Dae pa makapanubod hasta sa ngonian an sarong babaye na magigin biktima nin pananaksak kan lalaking enot nang nagkukursunada saiya.
Binisto an biktimang si Rhea Vargas, 25-anyos na residente kan Brgy. Sabang sa ciudad kan Legazpi.
Sa intrevista kan Bombo Radyo Legazpi ki Barangay Kagawad Edgardo Balmadrid kan nasabing barangay, napag-araman na paramientras sanang nagluwas an biktima huli sa importanteng babakalon.
Alagad sa pag-abot kaini sa eskinita, duman nahiling si alyas “Billy” na pigsasabing haloy nang naghahanga sa babaye.
Labing pagkakigkig man ni Rhea kan bigla na sana ining magluwas nin patarom asin saksakon sa liog asin tagiliran mientras na marikas man na nagdulag an suspek.
Swerte man na nag-agi sa lugar an tugang kan biktima na si Regina kaya tulos ining naidalagan sa ospital.
Mientras tanto, nagluluwas man sa inisyal na imbestigasyon na nabisto kan babaye an suspek sa dating pigtatrabauhan na pirming nag-oopresir na maghatod sa harong na pigtu-turndown man kan daraga.
Sa presente, nagpahayag man an pamilya kan suspek sa mga otoridad na kusa na sana ining isusurendir sa Legazpi City PNP.
