LEGAZPI CITY- Binawian nin buhay an sarong lineman kan Sorsogon Electric Cooperative makalihis na makuryente sa banwaan kan Juban.
Segun ki Police Master Sergeant Donnel Grefaldo, an investigator PNCO kan Juban Municipal Police Station sa intrevista kan Bombo Radyo Legazpi na an biktima nakuryente mantang nagpapakaray nin sarong linya kan kuryente.
Tulos man ining naidalagan sa ospital alagad dae na naisalbar pa.
Napag-araman na malala an sinapar na injuries kan nasabing biktima huli sa pagkaka kuryente.
Mientrastanto, nagpaguiromdom man an opisyal sa mga namamanwaan na kun may insidente siring kan power outages o may diperensya an linya nin kuryente dae basta-basta paghiruon kan mga ini asin mag-apod na sana nin tabang sa mga propesyunal para sa saindang kaligtasan.
