LEGAZPI CITY — Naibugtak na kan Police Regional Office Bicol an “Ligtas SumVac 2017” para sa summer vacation period kun saen naka-istasyon na an mga police help desks sa mayor na parte kan rehiyon ngane na siertuhon an paz y orden siring man an kaligtasan kan mga turista asin byahero hale sa Metro Manila pasiring sa saen man na parte kan rehiyon.
Segun ki regional police director Chief Supt. Melvin Ramon Buenafe, apwera sa police assistance centers, nag-establisyar pa sinda nin beat patrols asin traffic management teams urog na sa mga primerong tinampo asin highways pasiring sa manlaen-laen na tourist destinations.
Pinunan an Ligtas SumVac 2017 kan Abril 7 asin mapadagos sagkod sa Hunyo 13 katakod kan pag-obserbar sa Lenten season, Araw ng Kagitingan, Labor Day, Flores de Mayo asin manlaen-laen na fiesta na komo na ipigkokondusir sa bulan nin Abril asin Mayo.
Sa mga panahon kaya na ini segun ki Buenafe, pig-aandaman an traffic congestion asin mga aksidente.
Apwera sa PNP personnel, nakipag-koordinar naman an Bicol police sa partner agencies arog kan Department of Health, Land Transportation Office, Land Transportation Franchising and Regulatory Board, private radio groups, non-government organizations asin iba pang community-based volunteers ngane magtabang sa pagtao nin public assistance sa mga pier asin road safety services.
Mientrastanto, nag-apela man si Buenafe nin aktibong suporta asin involvement kan publiko sa paagi kan pag-report nin anumang impormasyon.
