LEGAZPI CITY- Nagpatanid an lokal na gobierno kan Legazpi na dae pigtutugutan an anuman na klase nin korapsyon asin panunuhol sa ciudad.
Ini makalihis na maarestar an duwang persona kasunod kan pagbalo na panunuhol ki Legazpi Public Safety Office head Octavio Rivero makalihis na maticketan huli sa nagkapirang mga bayolasyon.
Segun ki Legazpi City Mayor Alfredo Garbin Jr. sa intrevista kan Bombo Radyo Legazpi na ipagpapadagos an pagsusunad nin kaso sa nasabing mga akusado.
Napag-araman na pinara an sarong truck huli sa kawaran nin permit, road obstruction, asin dae pagsunod sa traffic sign.
Nagtutubod si Garbin na magigin leksyon an insidente sa iba pang mga drivers o violators na magbabalo na suhulan an mga enforcers.
Inomaw man kan alkalde an nagin paninindugan ni Rivero asin mawot na pangarugan kan iba pang mga enforcers.
