Sarong bill an pigbubusol ngonian sa senado na obhetong ipautob an mas mahigot na transparency sa mga oil companies sa nasyon katakod kan mga reklamo kan publiko dapit sa suboot premature asin kaduda-duda na paglangkaw kan presyo kan petrolyo.
Sa irarom kan Senate Bill No. 641, tatawan nin kapangyarihan an Department of Energy (DOE) na obligahon an mga oil companies na magsumiter nin detalyadong record kan saindang oil prices kabali na an actual costs.
Igwa man nin automatikong mekanismo na magsusugo sa mga kompanya na magpaluwas kan saindang gastos kun an Dubai crude oil an makaabot na sa sarong itinalaan na lebel nin presyo base sa Means of Platts Singapore (MOPS).
Segun ki Senador Erwin Tulfo, co-author kan nasabing bill, dapat maging transparent an mga oil companies manungod sa saindang actual costing imbes na magdeklarar nin price hike base sa presenteng giyera sa Middle East.
Mientrastanto, marurumduman na sa ginibong hearing kan Senate Committee on Ways and Means, sinabi kan DOE na nagpadara na nin surat an ahensya nganing magpaliwanag an mga gasolinahan na pigdududahan na nag-aabuso sa sitwasyon, urog na sa tensyon sa Middle East.
Sa ibong kaini, aminado an ahensya na limitado an saindang kapangyarihan sa irarom kan eksistidong Oil Deregulation Law.
Katakod kaini, tinawan duon ni Tulfo an pangangaipo para sa mas permanenteng solusyon sa paagi kan ley, nganing masyerto na papaninimbagon an mga kumpanya asin protektado an mga konsumidores.
