Nagtutubod si dating Senador asin Congressman elect Leila de Lima na pagbayolar sa 1987 Constitution an lakdang ni Senate President Francis Escudero na i-octaba an pagtukar kan impeachment articles laban kay Vice President Sara Duterte.
Segun kay De Lima, malinaw sa Article XI, Section 3(4) kan Konstitusyon na kapag may verified impeachment complaint na pirmado kan dae mababa sa one-third kan mga miyembro kan Kamara de Representates, dapat tulos na ponan kan Senado an paglilitis.
Magigirumduman na an impeachment complaint kay VP Duterte an nakakuwa nin 215 na pirma kan mga kongresista kun sain lagpas ini sa pighahagad na one-third kan Kamara.
Enot na kaini an inilipat ni Escudero an presentation kan impeachment articles hale Hunyo 2 na pagbubukas liwat kan sesyon pasiring sa Hunyo 11.
Pagdoon ni De Lima, an paglilitis an bako opsyonal, asin obligado an Senado na maghiro bilang impeachment court.
Naenot nang pinadarahan ni Escudero kan imbitasyon an Kamara kan Mayo 23 nganing magpoon an proseso sa Hunyo 2, alagad biglang nagpadara ng panibagong surat kan nakalihis na semana nganing i-octaba ini.
Mientrastanto may agam-agam ngonian an pirang legal experts na posibleng maapektaran an ligalidad kan proseso kun an 20th Congress an makapot kan impeachment na isinunad sa irarom kan 19th Congress.
