LEGAZPI CITY — Nanangapudan an mga kapulisan sa mga quarry operators na makipagkooperar sa sainda asin ipundo na muna an pagsasagibo nin mga aktibidad sa laog kan 8-kilometer extended danger zone.
Segun ki Police Supt. Nilo Berdin Jr., maski ano pa an rason kan mga ini, mahigot na ipinagbabawal an anuman na aktibidad harani sa pamitisan kan bulkang Mayon huli sa dara kaining peligro.
Pag-eksplikar kan opisyal, kaya ipig-ebakwar an mga residente ngani na maisalbar an buhay sa huma kan bulkan alagad igwang nagpupumirit na bumalik.
Pagtataong linaw man kaini na dae ninda pigpupugulan sa paghahanap buhay an mga operators alagad mas importante ngunyan an buhay.
Dugang pa ni Berdin na kun igwang mangyaring maraot, an mga kapulisan asin concerned agencies an pigbabasol maski pa pigigibo man ninda an saindang mandato.
Aminado man an opisyal na dae kayang bantayan kan mga kapulisan an bilog na syudad urog pang kadaklan sa mga PNP personnel an nagbabantay ngunyan sa mga evacuation center kaya igwa sindang mga tawo sa lugar na nagpapaabot sainda nin impomasyon.
