LEGAZPI CITY — Ipigsugo ni Legazpi City Mayor Noel Rosal na i-decongest an gabos na evacuation centers sa ciudad na okupado kan mga residenteng sakop kan 6-kilometer Permanent Danger Zone (PDZ) asin kan extended 2-km danger zone sa norteng mga barangay sa pamitisan kan bulkang Mayon.
Idinesignar ni Rosal an City Social Welfare and Development Office (CSWDO) asin City Risk Reduction and Management Office (CRRMO) na imantenir an kalinigan sa mga evacuation centers ngani maibitaran an paglakop kan helang.
Nasa 15 pamilya an nag-ookupa ngonian sa sarong kwarto sa evacuation centers alagad mawot ni Rosal na ibaba ini sa walong pamilya sana.
Pipasierto pa kan alkalde sa CSWDO na matawan an gabos na evacuees nin relief goods kasabay na an malinig na inumong tubig.
Inengganar man ni Rosal an city health office (CHO) na magkaag nin medical station na may kaibang ambulansya sa kada evacuation centers para sa medikal na pangangaipuhan kan tawo.
Mientras tanto, matao an sarong telecommunications provider nin libreng pag-apod asin charging services sa mga apektadong residente sa Albay.
Segun ki Ramon Isberto, pamayo kan Public Affairs department kan kumpanya na an “Libreng Tawag” services asin “Libreng Charging” stations an naka-standby sa Lower Binogsacan Elementary School sa Guinobatan asin Cabangan Elementary School sa Camalig.
