LEGAZPI CITY- Nagpapadagos an ipigkokundusir na medical mission kan Legazpi City Veterinary Office sa mga live stock na ipig-ebakwar hali sa laog kan 6km radius permanent danger zone.
Ini an sa tahaw kan padagos na aktibidad kan bulkang Mayon.
Segun ki Legazpi City Veterinarian Dr. Emmanuel Estipona sa intrevista kan Bombo Radyo Legazpi na inenganyar ninda an mga tagsadiri kan nasabing mga hayop na ibaba muna an saindang mga ataman ngani na maibitaran na maapektaran an salud kan padagos na aktibidad kan bulkan.
Partikular na piglilikayan kaya an epekto kan ashfall sa mga ini.
Segun sa opisyal na enot na sindang nagpasiring sa nagkapirang mga barangay sa ciudad na nagtalaan nin pooling sites ngani na masierto na matanos an salud kan mga livestock asin nakatalaan pang maglibot sa iba pang mga barangay.
Dugang pa ni Estipona na bako sana salud kan mga ataman na hayop an saindang mawot matutukan kundi magin an salud kan publiko.
