LEGAZPI CITY – Magpapaapod nin meeting an Legazpi City Veterinary Office sa mga hog raisers and dealers sa ciudad tangarig na diskutiron an mga lakdang sa paglaban sa African Swine Fever (ASF) asin iba pang posibleng makaolakit na helang sa mga orig.
Ini makalihis na maaraman an pagkagadan kan mga orig sa nagkapirang lugar na huli sa dae pa maaraman na helang.
Sa intrevista kan Bombo Radyo Legazpi ki City Veterinarian Dr. Emmanuel Estipona, pinag-aadalan na an ilalatag na contingency plan tangarig na dae na makalaog an pighahaditang helang sa ciudad.
Aminado an opisyal na dakula an magigin epekto kaini sa industriya asin delikadong maray an darang ‘highly-resistant to disinfectant’ na virus na may 100% mortality rate sa mga orig.
Mantang pighahalat an direktiba hali sa Department of Agriculture (DA), mas marhay na segun ki Estipona na magpaotob nin preventive measures.
Inalerto na man an mga ataman na orig na bantayan asin i-monitor an salud kan mga hayop.
