LEGAZPI CITY — Liwat na namang nairehistro kan Philippine Institute of Volcanology and Seismology (PHIVOLCS) an pagbuga nin lava kan bulkang Mayon kasubanggi.
Base sa Phivolcs, bandang alas 10:45 kasubanggi kan mangyari an lava fountaining na may langkaw na pigkakarkulong maabot sa 500 metro.
Nanotaran man an ash plume na pasiring sa sur-sulnupan asin nagbagsak sa banwaan kan Guinobatan.
Kasuodma sana, nag-abot sa 14 an rockfall events kan bulkan asin nairehistro an sampulong pyroclastic density currents (PDC).
Segun ki Phivolcs Legazpi chief Ed Laguerta, halangkaw man liwat an posibilidad na magkaigwa nin magmatic eruption maski na nagtetenir ining nakataas sa Alert level 3.
Sienerto man kan ahensya na nakabantay ini ngani magtao nin abiso sa mga Albayano.
Mientras tanto, nasa 26 na evacuation center pa an nasa 7,256 na pamilya o 27,643 na indibidwal na apektado kan padagos na pag-aalburuto kan bulkang Mayon.
Mahigot man liwat na pinag-iingat an publiko sa pagrane sa palibot kan bulkan asin an paglaog sa 6 kilometer-radius Permanent Danger Zone (PDZ) asin sa 7-km Extended Danger Zone (EDZ).
