LEGAZPI CITY—Nakapagrehistro nin landslide an banwaan kan Baras sa probinsya nin Catanduanes huli kan warang patod na pag-uuran dara kan shearline.

Segun ki Engr. Khalil Tapia, an pamayo kan Municipal Disaster Risk Reduction and Management Office Baras, sa intrevista kan Bombo Radyo Legazpi, nangyari an landslide sa Barangay Genitligan sa may boundary kan banwaan nin Gigmoto asin Baras.

Sinabi kan opisyal na harayo man an naunambitang landslide sa settlement o sa mga kaharongan kan barangay alagad naapektaran kaini an access pasiring sa Gigmoto.

Tulos man na inapudan kan saindang opisina an Department of Public Works and Highways para magkundusir nin clearing operation sa nasambitang landslide huli ta saro ining national road asin pig-aagihan kan mga motorista.

Nagpagiromdom man an opisyal sa mga kahimanwa na padagos na mag-monitor asin makipagkoordinar sainda en kaso may emerhensya o insidente na nangyari sa saindang lugar para matabangan sinda, asin magin maingat lalo na ngunyan na may raot nin panahon.

RELATED ARTICLESMORE FROM AUTHOR