LEGAZPI CITY- (Update) Naibuyagyag na sa mga otoridad an pagkakabisto kan suspek sa pananakasak sa sarong sound system operator sa Brgy. Putiao, banwaan kan Barcelona, Sorsogon makalihis an maabot sa sarong bulan na imbestigasyon.
Kun babalikan, nag-ooperate kan sound system para sa sarong pabayle sa covered court kan nasabing barangay si Zaldy Estopres kan magkainitan ini kan suspek na enot nang namidbidan na si alyas Bagi.
Makalihis an ribayan nin mga maiinit na tataramon, nag uli an suspek alagad pagbalik igwa nang darang screw driver na binalong saksakon an nakigkig na biktima.
Swerteng sa walang braso sana an sinapar na tama kan biktima na tulos man na nakadulag asin nakahagad nin tabang.
Binisto an nasabing suspek na si Argie Samonte na sa ngonian an sinangatan na nin kasong Attempted Homicide sa Sorsogon Provincial Prosecution Office sa ciudad kan Sorsogon.
