Lalaking suboot ‘may sanib’, nanghostage nin menor de edad sa sarong pabasa
LEGAZPI CITY — Nagpapadagos pa sa ngonian an hot pursuit operation kan pulisya tangarig na maaraman an lokasyon asin madakop an suspek sa panghohostage sa sarong menor de edad sa ciudad kan Tabaco.
Sa intrevista kan Bombo Radyo Legazpi ki P/Supt. Jefferson Araojo, hepe kan Tabaco City Police, enot suboot na nagwala an suspek na binistong si Rodel Bondal, 23-anyos sa sarong pabasa.
Nagdurulagan an mga tawo paluwas kan punan kaining tigbason kan darang tabak an pinto kan harong sa Purok 7 Brgy. Nagsipit.
Tulos man na ipinaabot an impormasyon sa kapulisan alagad kan maaraman ini kan suspek, naalarma si Bondal kaya dinara mantang natututukan kan darang patarom an sarong 13-anyos na daragita na napag-aramang first cousin man sana kaini.
Dinara kan suspek sa maawot na parte kan barangay an biktima tangarig na ipamprotekta sa sadiri hasta sa nagibong makadulag kan daragita asin makua kan pulisya na nanluluya na huli sa takot asin gutom.
Sa istorya man kan pamilya kan suspek, maboot man suboot ini alagad nagbabago sana an ugali kun igwang ‘nagsasanib’ katakod kan pigmamateng helang.
Sa ngonian, desidido an mga otoridad na madakop ini tangarig na dae na makapagdara pa nin huma sa iba urog na armado pa man giraray ini kan patarom.
