LEGAZPI CITY—Arestado kan mga otoridad an pigkokonsiderar na municipal most wanted sa banwaan kan Libon, Albay sa kasong panlulugos.
Makalihis na magtago nin haros 16 taon naarestar an suspek na si alyas ‘Rolly”, 36-anyos asin residente kan nasambitang banwaan.
Naarestar ini sa ipinaluwas na mandamiento de aresto kan Regional Trial Court, 5th Judicial Region, Branch 13, Ligao City kan Enero 20, 2009 sa kasong panlulugos na warang pigrekomendang piyansa.
Basado sa imbestigasyon, imbuelto an suspek sa kasong panlulugos na isinunad kan taong 2009, alagad, dagos nang nawara asin nagtago ini sa ley kan nacion.
Sa paagi kan masusing pagsubaybay asin intelligence operations, nakua kan mga otoridad an pigteteniran kan suspek kun saen tulos man ining inarestar.
Sa presente, nasa kustodiya na kan Libon MPS an suspek asin nakatalaang hampangon an kasong isinunad laban digdi.
