Lalaki nakuang gadan sa construction site sa Cotabato City.
Sarong lalaki an nakuang gadan sa sarong construction site sa Block 19B, Zenaida Subdivision, Barangay Rosary Heights 8, Cotabato City.
Binisto an biktima na si Edwin Gallardo Baya, Jr., 34 anyos, sarong driver asin residente kan kaparehong lugar.
Base sa imbestigasyon kan pulis, nawalat suboot si Baya sa construction site kaiba an saiyang katrabahong si Rodel Gangci na laborer na taga Matalam, North Cotabato.
An duwa nawalat na magbantay sa lugar mantang an ibang trabahador temporaryong nag-uli sa harong sa Midsayap, Cotabato.
Pagbalik kan saindang mga kairiba, nadukayan ninda an bangkay kan biktima sa laog kan lugar.
Igwa siyang lugad sa payo asin kilikili.
Wara sa pinangyarihan si Gangci na pighahanap ngonian kan mga awtoridad bilang pangenot na suspek.
Sa pinangyarihan kan krimen, narekober an sarong bolo, kutsilyo, asin sarong padis nin tsinelas na may bakas nin dugo asin pigtutubodan na sadiri kan suspechado.
Segun sa pulis, posibleng dae pagkakaintindihan an motibo sa pananaksak asin paggadan.
Dinara na an bangkay kan victima sa sarong punerarya sa ciudad para sa magkakanigong disposisyon, mientras na nagpapadagos an imbestigasyon tanganing masubaybayan an kinamumugtakan kan suspechado asin matawanan nin liwanag an enterong insidente.
