LEGAZPI CITY — Magkahalong dagit asin panghihinayang an namamatean ngonian kan mag-inang Ederliza Almonte, 48 anyos asin Kate Loren Almonte, 23 anyos makalihis na mapag-aramang nagkapira sa mga importanteng gamit kaini an nawawara sa harong sa Happy Homes Subd., Brgy. Gogon, sa ciudad kan Legazpi.
Sa inisyal na imbestigasyon kan Legazpi City Police, napag-araman na nakalaog an mga parahabon makalihis na magsakat sa konkretong kudal kan harong asin nag-agi sa fire wall na harani sa bintana kan saro sa mga kwarto na nasa ikaduwang eskalon.
Pwersahan man kaining rinangka an bintana kan makasakat na saka kinua an mga gamit kan nasa laog na kan harong.
Nagkapira sa mga nalalay kan mga parahabon an cash na $1000; sarong yunit nin laptop na nagkakantidad P30,000.00; sarong go pro camera na kantidad P30,000.00; apat na mamahalon na cellphone, asin manlaen-laen na klase nin alahas asin mga relo.
Nagkokondusir na kan follow up investigation an mga otoridad sa presente para sa posibleng pagkakabisto kan mga suspetsado asin an piglalaoman na pagkakarekober kan mga items siring man an pagsasangat kan magkakanigong kaso kontra sa mga ini.
