LEGAZPI CITY- Aminado an grupo nin mga drivers na dakulang tabang para sa sainda an pagkakaigwa nin big-time rollback sa produktong petrolyo na nakatalaan na ipaotob sa masunod na semana.
Segun ki Basta Driver Safety Enforcer chairman Ronnel Nebres sa intrevista kan Bombo Radyo Legazpi na an labi sa P2 na tapyas sa oil prices an makakabawasa na sa dakulang gastos kan mga drivers sa saindang pagpapasada sa urualdaw.
Ini urog pang nasa 20 litro hasta 30 litro suboot an nagagamit sa maghapon na pagpapasada kan mga jeepney drivers.
Naglalaom man an grupo nin mga transportasyon na magpapadagos na an mga ipapaotob na rollback ngani na maski papano an madugangan man suboot an ganansya kan mga drivers.
Mientras tanto, nilinaw man ni Nebres an mga hinaing kan mga commuters na dae nagbababa an pamasahe sa ibong kan mga rollback huli ta nakabase suboot sinda sa taripa na pigtatalaan kan Land Transportation Franchising and Regulatory Board.
Marurumduman kaya na sa presente nasa P13 an minimum fare sa provincia kan Albay.
Sa ibong kaini, aminado an opisyal na an ibang mga pasahero an dae man liwat nagsusunod sa minimum fare asin kulang an ipigbabayad na mga pamasahe.
