LEGAZPI CITY- Sako-sakong piniratang CD/DVD an nakumpiskar kan mga otoridad sa banwaan kan Daraga sa Albay makalihis an ipigkondusir na operasyon sa business district area kaini partikular na sa Rizal Street.
Sa intrevista kan Bombo Radyo Legazpi ki P/Supt. El Cid Roldan, hepe kan Daraga Municipal Police Station, pighayag kaini na an operasyon an pinangenotan ni Atty. Anselmo Madriano, chairman kan Optical Media Board (OMB) sa pakikipagtabangan sa saindang hepatura.
Narekober digdi an nasa 101 na sako nin CD/DVD na nagkakantidad nin P14,140,000 hali sa mga negosyante sa nasambitan na lugar.
Segun ki Roldan, uminabot sa 40, 400 pidaso kan mga CD na nagkakantidad nin P350 kada saro an saindang nakumpiskar hali sa mga sidewalk kan banwaan.
Dugang pa kan opisyal, nasasabutan ninda kun nata sa Daraga sana nagkaigwa nin siring na operasyon huli ta kulang man an mga personahes kan OMB.
Sa presente nasa kustodiya na kan Daraga Police an nasambitan na mga bagay para sa magkakanigong disposisyon mantang pigpepreparar na man an kasong isasangat kontra sa mga negosyante na nagpapabakal kaini.
