LEGAZPI CITY-Nairehistro kan Philippine Coast Guard (PCG) na labi sa 1,800 na pasahero, truck drivers, asin cargo helpers an na-stranded sa manlain-lain na pantalan sa nacion poon alas-12 nin pagka-banggi hasta ngonian na aldaw huli sa epekto kan Bagyong Uwan.
Sa Rehiyon Bikol, uminabot sa 1,245 katawo an na-stranded sa 10 pantalan kairiba an Matnog, Virac, asin Pilar Port, mantang 474 rolling cargoes asin 6 vessels an dai makakabiyahe.
Sa Northeastern Mindanao, nasa 151 rolling cargoes asin 4 vessels an na-stranded sa Lipata Port, mantang 2 vessels an temporamenteng nakasirong.
Sa Southern Visayas, 10 katawo kairiba na an 59 cargoes, asin 5 vessels an naapektaran sa Barcelona asin Manta-angan Port.
Sa Southern Tagalog, nasa 119 katawo, 45 cargoes, asin 15 vessels an na-stranded sa mga pantalan sa Lucena, Romblon, asin Real, mantang 14 vessels an temporamenteng nakasirong.
Sa Western Visayas, nasa 495 katawo asin 32 cargoes an na-stranded sa Arastre, Manoc-Manoc, asin Caticlan Port, mantang 2 vessels an temporamenteng dai makabiyahe.
Sa kabilugan, nasa 24 pantalan sa limang rehiyon an naapektaran, kun sain 1,869 katawo, 761 cargoes, asin 30 vessels an na-stranded, mantang 23 vessels asin 4 motorbancas an temporamenteng dai makabiyahe.
