LEGAZPI CITY—Nakumpiskar sa sarong nasa listahan kan high value individual kan kapulisan an nasa P1.3 milyones na kantidad nin pigtutubudang shabu sa Barangay Balangibang Polangui, Albay.
Binisto an suspek na si alyas “Jhon”, 23-anyos, delivery driver asin residente kan Taguig City.
Nakumpiskar digdi an sarong pidasong medium heat sealed transparent plastic sachet na may laog na crystalline substance na pigtutubudang shabu na may gabat na limang gramos asin may market value na P34,000 karibay kan buy bust money.
Sa padagos na pagsiyasat sa suspek, nakumpiskar liwat saiya an duwang pidaso nin nakabugkos na transparent plastic sachet na may laog na pigtutubudang shabu kun saen may gabat ini na nasa 200 gramos asin standard drug price value na nasa P1,360,000.
Sumatotal, nakumpiskar sa suspek an nasa kabilogang gabat na 205 gramos nin pigtutubudang shabu asin may standard drug price na P1,394,000.
Naarestar ini sa intel driven joint drug buy-bust operation kan mga operatiba kan Provincial Intelligence Unit, Office of the Regional Director-Regional Police Drug Enforcement Unit 5, Philippine National Police (PNP) Drug Enforcement Group-Special Operations Unit 5, Polangui Municipal Police Station, Philippine Drug Enforcement Agency Albay asin pakikipagkoordinar sa PDEA Regional Office 5.
Mientastranto, an mga nakumpiskar na ebidensya asin an suspek na nasa kustodiya kan Polangui MPS para sa magkakanigong disposisyon.
Mahahampang ini sa kasong pagbalgar sa Republic Act 9165 o an Comprehensive Dangerous Drugs Act of 2002.
