Ipinahayag ni Energy Secretary Sharon Garin an pag-abot kan labi sa 300,000 na bariles nin diesel na pig-order kan gobyerno kan Pilipinas nganing pakusugon an reserbang supply nin langis kan nasyon sa tahaw kan nagpapadagos na krisis sa Middle East.
Segun ki Garin, an shipment kan Philippine National Oil Company–Exploration Corp. (PNOC-EC) hale sa Malaysia an nag-abot sa kabilugang 329,000 na bariles, o labi sa 52 milyong litro nin diesel.
An supply an parte kan lakdang kan gobyerno na magtipon nin gasolina mantang nagpapadagos pa an giyera sa Middle East.
An nasabing kargamento an parte man kan kabilugang 900,000 na bariles nin diesel na piglalaoman na maabot sa nasyon ngonian na Abril, na ipapaabot sa tulong batch na tig-300,000 bariles an kada saro.
An masunod na duwang batch an piglalaoman na maabot sa ikaduwa asin ikatulong semana kan bulan.
An ikaduwang batch an hale sa North Asia o India, mantang an ultimong batch an babakalon sa Oman.
An 900,000 na bariles nin diesel na pig-order kan gobyerno an parte man kan mas dakulang order na 1.042 milyong bariles, kun saen 142,000 na bariles an nag-abot hale sa Japan kan Marso 26.
Kan Abril 3, sinabi kan Department of Energy (DOE) na igwang 75.052 milyong litro nin oil supply an nasyon na piglalaoman na magtetenir sa laog nin 50 aldaw.
Sa presente, an nasyon igwa nin 2.516 milyon na litro nin diesel, katampad nin poco mas o menos 47.26 na aldaw nin suplay.
