Maabot sa kabilugang 122 na mga barko kan China an liwat na nahiling kan Philippine Navy sa nagkapirang features kan West Philippine Sea.
Ini an inireport ni Philippine Navy spokesperson for the West Philippine Sea, Commo. Roy Vincent Trinidad basado sa saindang pinakahuring monitoring sa nasabing mga pinag-aagawang kadagatan.
Sa tahaw ini kan ipigpapaotob na fishing moratorium ban na ipinaotob kan China sa West Philippine Sea.
Puon kan Mayo 21 hasta Mayo 27,2024 an igwang nahiling na presensya kan Philippine Navy na maabot sa 34 na Chinese Maritime Militia vessels, sarong China Coast Guard vessels, asin sarong People’s Liberation Army Navy ship sa Pag-asa Island.
Sinundan ini kan nasa 30 Chinese Maritime Militia vessels asin apat na PLAN ships asin duwang China Coast Guard vessels sa Sabina shoal.
Magin sa Ayungin shoal, Bajo de Masinloc shoal, Patag Island, Kota asin Lawak Island an kadakol man na nahiling na mga barko kan China.
Kun magigirumduman, an numero kan mga barko kan China na nahiling sa West Philippine Sea sa nasabing petsa an mas hibaba hali sa 153 na mga Chinese vessels na na-monitor sa nagkapirang parte kan nasabing pinag-aagawang teritoryo puon kan Mayo 14 hasta Mayo 20,2024.
