Kinumpirmar kan Land Transportation Franchising and Regulatory Board (LTFRB) ngonian na Sabado, Marso 28, na maabot sa 1,297 na pampasaherong bus sa nasyon an tinawan nin special permit nganing magbiyahe para sa Semana Santa.
Piglalaoman na sa panahon na ini, magkakaigwa nin pagdagsa nin mga pasaherong mauruli sa mga probinsya nganing magbakasyon asin maggirumdom kan Semana Santa.
Segun ki LTFRB chairperson Vigor Mendoza II, tinawan nin special permit an mga bus ngani na masierto na igwa nin supisyenteng units na mapasada sa kagsagsagan kan pagdakol kan mga pasahero.
Apwera kaini, piglalaoman man kan ahensya an mas dakul na pasahero huli ta dakul an posibleng pipilion na magin praktikal asin dae na gamiton an saindang pribadong behikulo sa ngonian, sa tahaw kan halangkaw na presyo kan langis.
Katakod kaini, pigsugo kan LTFRB chief an gabos na regional directors kan ahensya na siertohon na nagsusunod sa road worthiness asin inspection protocols an mga public utility vehicle terminals.
Pigsugo man kaini an mga bus operators asin drivers na siguraduhon na ligtas asin maray an pagbyahe kan mga pasahero.
Mientrastanto, nagsagibo nin mahigot na inspeksyon an ahensya sa mga PUV terminal ngani na matugunan an mga reklamo manungod sa mga pasilidad na nakakakompromiso sa kaligtasan kan mga pasahero.
Nagpatanid man an opisyal sa mga mabalgar na ipapaapod an mga ini asin hahagadan nin ipaliwanag kun ngata dae sinda dapat padusahan.
 confirmed this Saturday, March 28, that a total of 1,297 passenger buses in the country have been given special permits to travel for Easter.){kind=link}