Nagluluwas na kaalyado sa pulitika ni Presidente Ferdinand Marcos Jr. an kontraktor sa likod kan inapod kan Presidente na warang silbing proyekto sa may Kennon Road sa Tuba, Benguet.
Base sa records kan Department of Public Works and Highways (DPWH), inilista kan 3K Rock Engineering si engineer Francis Cuyop bilang general manager.
Ipigtindog niya an nasabing construction firm bilang sole proprietor asin nagpoon an operasyon kaini kan Enero 27, 2000.
Nagdalagan si Cuyop bilang representante lone district kan Ifugao kan May 2025 elections alagad nadaog siya ni Atty. Solomon Chungalao.
Nagkandidato siya sa irarom kan Partido Federal ng Pilipinas (PFP) na pinangengenotan ni Presidente Marcos.
Alagad, nanindugan an hepe ehekutibo na wara nin kaalyado o kalaban sa bagong crackdown laban sa mga kurakot na opisyal asin pribadong kontratista na imbuelto sa mga anomalya na flood control project kan gobyerno.
