LEGAZPI CITY- Nakapag-rehistro na nin kabilugang 65 kaso kan leptospirosis an Bicol Region sa laog nin walong bulan.
Sa datos kan Department of Health Center for Health and Development Bicol, ang provincia kang Camarines Sur an mantenidong igwa nin pinakahalangkaw na bilang na uminabot sa 25 kaso, sunod an Camarines Norte na igwang 13 kaso, 10 sa Albay, 7 sa Masbate, Sorsogon na igwa nin 6 asin 3 sa isla kan provincia kan Catanduanes.
Segun kay Dr. Lulu Ramos-Santiago, an Emerging and Re-Emerging Infectious Disease (EREID) Program Manager, DOH-CHD Bicol, nakapagrehistro nin 2 binawian nin buhay an probinsya kan Masbate, mantang tigsararo man sa natatadang apat na probinsya asin 0 fatality sa parte kan Sorsogon.
Segun pa kay Dr. Santiago, an nasabing bilang na ini an hibaba kumpara kan nakalihis na taong 2023 na nakapagrehistro nin 248 na kabilugang kaso mantang igwa nin 24 fatalities.
Mientrastanto, piglalaoman pa suboot na malangkaw an datos na ini makalihis makapagrehistro nin mga pagbaha sa ibang parte kan rehiyon huli sa bagyong si Enteng.
Tulos na nag-abiso si Dr. Santiago sa mga residenteng naapektaran kan mga pagbaha na magpakonsulta sa RHUs asin City Health Offices enkasong makamati kan kumon na sintomas.
Kalimitang pig-aabot suboot nin pito sagkod sampulong aldaw an incubation period kan virus antes makamati nin mga senyales an sarong persona.
Mientrastanto, padagos man suboot an programa kan Department of Health siring sa information dissemination tanganing maimpormaran an publiko sa tamang pag-manehar kan nasabing helang.
Target kan ahensya na dae na madugangan pa an bilang kan fatalities na tinamaan kan leptospirosis sa naunambitang rehiyon.
