Liwat na nairehistro sa Australia partikular sa kanlurang parte kan nasambit na nasyon an paglangkaw nin numero kan mga tinamaan nin COVID-19 kun saen nairehistro an 75 na naulakitan asin pigdara sa mga hospital uroaldaw.
Segun sa surveillance data kan health department sa Australia pinaghahandalan ninda an paglangkaw kan kaso kan COVID-19 ngunyan na holiday season na posibleng magkawsa man nin takot sa saindang health workers pag naglala an sitwasyon.
Nagpatanid an mga otoridad na pirmihan magsulot nin face mask sa matatawong lugar asin kun may helang pig-abisohan na magtenir sa mga kaharongan.
Pig-engganyar man an publiko na mag-self isolate kun makakaeksperyensya nin mild symptoms.
An marikas na pag-uulakit na naeeksperyensyahan kan mga Australian sa COVID-19 resulta kan pagluya kan saindang immune system.
Mientrastanto, pig-engganyar man kan nasambit na departamento an publiko na magpa-booster shot an nasa edad 64-74 anyos kan kada-12 bulan maski igwa o warang malubhang namamatean.
Mantang an nasa edad 18-64 anyos na warang malubhang namamatean pwedesir na magpabakuna kada 12 bulan.
Para man sa edad 5-17 anyos na igwang severe immunocompromise, pwedesir na magpabakuna man nin kada 12 bulan.
