LEGAZPI CITY – Bineperipika na kan Albay PNP an alegasyon na miyembro suboot kan rebeldeng New People’s Army an naiimbweltong kapitan kan Barangay Maninila sa nangyaring panginginidnap sa sarong aking negosyante sa Camarines Sur.
Segun ki C/Insp. Arthur Gomez, tagapagtaram kan Albay Police Provincial Office, sa naging imbestigasyon kan Camalig PNP, napag-araman na imbwelto si Barangay Captain Gerry Mancera sa illegal gambling activities sa saiyang lugar.
Pig-aaraman man suboot ninda sa saindang ikokondusir na follow-up investigation kun totoo an alegasyon miyembro ini kan NPA.
Nangangalas man an mga otoridad na naituro kan biktimang si Francis Leo Maulion an kapitan maging an barangay tanod.
Enot kaini, dinukot kan limang suspetsado an nasabing negosyante kan Nobyembre 23 kan nakalihis na taon sa saiyang farm sa Camarines Sur kun saen hinagadan pa nin P30 milyon ransom an saiyang pamilya para sa saiyang libertad.
Nakapagtao pa an pamilya nin haros P1.5 milyon alagad dae inirelease an biktima kun kaya naghagad na nin tabang an pamilya sa PNP Anti-Kidnapping Group.
Makalihis an matrayumpong operasyon na nagresulta pa sa pagpapalitan nin putok sa pagultanan kan pulis asin mga suspek, nagibong maituro kan biktima kun saen siya itinago.
May mga palatandaan suboot si Maulion sa saiyang naging kulungan.
Sa ngunyan, nasa Kampo Krame na an mga suspek asin pighahanda na suboot an kasong isasangat laban sa mga suspetsado.
