LEGAZPI CITY — Inilunsar kan Department of Trade and Industry (DTI) Albay sa pakikipagtabangan sa Philippine Theater for Entrepreneurship an Kapatid Mentoring program para sa mga micro, small, and medium enterprises (MSMEs.)
Segun ki DTI Provincial Director Rodrigo Aguilar, obheto kan nasabing programa na matukduan an mga saradit na negosyante na padakulaon asin padalaganon an saindang mga negosyo.
Ikokondusir an mentoring program kada semana sa laog nin apat na oras sa paagi kan mga iimbitarang expert asin successful enterpreneurs hale pa sa Manila asin ibang parte kan nasyun.
Segun ki Aguilar, magayon ining programa huli ta magigin informal sana an interaksyon kan mga resource persons kun saen iheheras kan mga ini an saindang success tips asin best practices ngane na magin matrayumpo sa piniling negosyo.
An 21 pre-selected MSMEs an maatendir kan programa sa laog nin sampulong semana.
Sienerto pa ni Aguilar na bako ini an magigin huring pagkondusir kan programa kundi mapadagos pa.
Pwedesir man suboot na magbale an mga negosyante basta pasado sa mga rekisitos arog kan nakalampas na sa sarong taon an negosyo, may kapasidad na iimplementar an ano man na improvement plans na gigibuhon asin may willingness asin commitment sa programa.
