LEGAZPI CITY-Nakahanda suboot an kampo ni Vice President Sara Duterte na hampangon an mga paratang laban sa kanya sa nagpapadagos na impeachment trial.
Ini makalihis magpoon na magpaluwas nin subpoena an Senate impeachment court ngani kuahon an nagkapirang bank records asin tax records kan Bise Presidente.
Segun sa tagapagtaram kan defense team kan Bise Presidente na si Atty. Michael Poa, bako sinda tutol sa paghahanap kan katotoohan.
Sinabi pa niya na mawot nindang masierto na an gabos na lakdang, naguuyon sa Konstitusyon, nagiiral na ley, asin mga alituntunin kan korte.
Dagdag pa ni Poa, piglalaoman na ninda an posibilidad na tugutan kan impeachment court an pagkua kan mga dokumento.
Handa man suboot sindang patunayang warang basehan an alegasyon kan suboot unexplained wealth ni VP Sara.
Kaiba sa mga pinadarhan na kan subpoena an Bureau of Internal Revenue (BIR), Anti-Money Laundering Council (AMLC), asin nagkapirang bangko.
Hasta Hulyo 30 an itinakdang deadline ngani isumiter an mga pighahagad na dokumento kan impeachment court.
Temporamente man na napundo an pagdangog kan impeachment trial dahil sa paghahanda para sa State of the Nation Address ni President Ferdinand Marcos Jr.
Marurumduman na nahahampang si VP Sara sa impeachment huli sa mga alegasyong “culpable violation of the Constitution”, “graft and corruption”, “betrayal of public trust”, asin bribery.
