LEGAZPI CITY — Nilinaw kan Simbahang Katolika na may nagkapirang pagtubod an tawo na bako susog sa totoong tradisyon kan Semana Santa.
Sa intrevista kan Bombo Radyo Legazpi ki Diocese of Legazpi Social Action Center Director Father Rex Arjona, inapod kaining “fake news” o bako totoong kaligtasan an dara kan pagpapapako sa krus kan ibang paratubod na pigigibo tuyong Biernes Santo.
Afuera kaini, bako man suboot totoo na ipigbabawal an pagkarigos tuyong alas 3:00 nin hapon kan Biernes Santo o makalihis an pagkagadan ni Hesus.
Wara man suboot na katotoohan na mas poderoso an pangkukulam sa aldaw kan pagkagadan ni Kristo.
Segun ki Arjona na kun dae man nakakaraot sa pagtubod, dae man pigkokontra kan simbahan, alagad kun apektado an pagtubod o nakakaraot dapat na itama.
Abiso kan padi na mas maray na sundon an mga tradisyon na susog sa tinugot kan simbahan asin sa katukduan kan Kagurangnan na mas makakapagpararom kan pagtubod kan lambang saro.
Mientras tanto, nakadepende man suboot sa mga parokya an isasagibong aktibidad katakod kan Semana Santa kun sain an iba may mga pakumpisla, recollection asin may prusisyon pa.
