LEGAZPI CITY – Kumpiyansa an ‘Andam Lahar Project’ na dakula an maitatabang kan pagsasagibo kan pinakaenot na lahar drill sa Albay tangarig maabot an zero-casualty goal urog na sa mga panahon na nagbababa an nagkapirang deposit kan Bulkang Mayon.
Pinunan na an proyekto kan Hulyo 24 sa Brgy. Salvacion sa Daraga, Hunyo 25 sa Brgy. Ilawod sa Camalig asin sa ngonian an aldaw isasagibo sa Brgy. Lidong sa Sto. Domingo, mga lugar na harani sa pamitisan kan bulkan.
Sa ekslusibong intrevista kan Bombo Radyo Legazpi ki France Jimenez, project manager, mayor na obheto suboot na maisalbar sa peligro an komunidad asin mabawasan an mga danyos sa propriedades.
Overwhelming suboot an response katabang an Albay Public Safety and Emergency Management Office (APSEMO), mga implementing local disaster management councils, non-government organizations asin iba pang importanteng kaparte kan aktibidad para sa preparedness kan provincia.
Kakaiba man suboot an drill sa mga regular nang ipigsasagibong training siring kan typhoon, fire asin earthquake drill.
Duwang scenario an sinundan kan mga partisipantes partikular na sa pagdausdos kan lahar sa panahon kan bagyo asin sa bulos kan makusog na uran huli sa makusog na habagat.
Tinutukan kan team an information dissemination sa pagpapaintindi kan warning level sa mga residente dawa sa persons with disability (PWDs) hasta sa evacuation asin relief assistance.
Inengganyar man ni Jimenez an mga miembro kan komunidad na ipaotob an mga natutunang procedures tangarig magin epektibo asin proactive an approach sa mga siring na sitwasyon.
