LEGAZPI CITY- Nanindugan an Kabataan partylist na lehitimo an saindang organisasyon asin wara nin rason nganing madiskwalipikar para sa pagdalagan sa eleksyon sa masunod na taon.
Kasunod ini kan isinangat na cancellation of registration plea kan National Task Force to End Local Communist Armed Conflict kontra sa Kabataan asin Gabriela partylist na pig-aakusarang konektado sa Communist Party of the Philippines (CPP) asin armadong grupo kaini na New People’s Army.
Sa eksklusibong intrevista kan Bombo Radyo Legazpi kay Rep. Sarah Elago, tinawang duon kaining wara nin katotoohan an mga nasabing alegasyon na nagkapirang beses naman na piggagapo sa grupo alagad dae man napoprobaran.
Segun kay Elago, seryoso asin sensiro an saindang grupo sa paggibo nin mga lakdang na para sa pigrerepresentar na sektor na iyo an mga joven.
Huli digdi wara suboot nin rason ngani na mapugolan an partylist sa pagdalagan sa eleksyon lalo pang wara man suboot nin basehan an mga akusasyon kontra sa grupo.
Magigirumduman na naenot naman na nagpuon an pagdangog kan korte sa cancellation of registration plea kan NTF ELCAC kontra sa Gabriela mantang pigtalaan pa sana an suway na hearing para sa Kabataan partylist.
