LEGAZPI CITY – Napaghandaan kan mga kapulisan sa banwaan kan Jovellar, Albay an nagin epekto kan mga pag-uuran na dara ni Bagyong Ada.
Segun ki Jovellar Municipal Police Station Chief of Police, Police Captain Rufino Casagan sa intrevista kan Bombo Radyo Legazpi na antes pa man mamatean an epekto kan naunambitang raot nin panahon, aram na ninda kun ano an mga barangay na dapat i-ebakwar, mga lugar na malulubog sa tubig baha asin dapat i-monitor.
Basado man sa saindang datos as of 5PM kan nakaaging aldaw (January 16), uminabot na sa labi poco mas o menos 108 na pamilya an saindang na-ebakwar pasiring sa mga ligtas na lugar o katampad nin 364 na indibidwal.
May mga kakalsadahan man naideklarang passable huli sa kusog kan nagragasang tubig alagad pira sa mga ini an marikas man na nag-subside o naghupa huli sa padagos na pagrahay kan panahon.
Pigtaram pa kan opisyal na huli ki Bagyong Ada, kinanselar na kan ibang Barangay an kafiestahan ni Sto. Niño nganing magtaong dalan sa pagpreparar asin pag-ebakwar kan mga residente.
Maugma niya man na pigbareta na wara sindang nairehistrong dae piglalaoman na insidente mantang nagtetenir na nakabantay an saindang mga personahes sa mga evacuation center para sa pagpapa-otob nin pazy orden.
Nangapodan man siya sa saindang residente na magin rigmat, mag-antabay sa mga abiso kan mga otoridad, asin magsunod sa mga ipapa-otob na lakdang kan Gobierno o Barangay para sa saindang kaligtasan sa tahaw kan maraot na panahon asin pag-aalburuto kan Bulkang Mayon.
