LEGAZPI CITY-Inarestar kan mga otoridad kan Russia an sarong Japanese Journalist sa pagdudang saro ining espiya na nagtitipon nin mga sekretong impormasyon manungod sa depensa kan Moscow laban sa Tokyo.
Binisto ini na si Yuki Imai, na nagtatrabaho para sa Hokkaido Shimbun newspaper.
Si Imai inaresto sa Sakhalin region, sarong aldaw sana antes an saiyang nakaiskedyul na pag-uli.
Susog sa mga otoridad kan Russia, si Imai suboot pinagbootan kan national intelligence service kan Japan na
maghanap nin impormasyon mapadapit sa mga tawong parte kan special military operations sa Kuril Islands.
Si Imai ipinadara sa Moscow, kasunod kan sarong kasuguan gikan sa Russian court na na nagbugtak saiya sa pre-trial detention.
Mientrastanto, an gobierno kan Japan naghahalat nin mga update manungod sa pag-arestar ki Imai, mantang sagkod ngonian dae pa ini nakakakontak sa nasabing peryodista.
An pag-arestar ki Imai nangyari sa tahaw kan nagdadakulang tensyon sa pag-ultanan kan Japan asin Russia, kasunod kan pagbisita ni Russian President Vladimir Putin kan Agosto sa Kuril Islands—sarong teritoryo na pig-aako kan duwang nacion.
An mga Kuril Island, namumugtak sa pag-ultanan kan isla kan Hokkaido, Japan asin Kamchatka Peninsula kan Russia, kun sain presenteng pinamamahalaan an Russia an archipelago mantang apat sa mga pulo kaini an pig-aako naman kan Japan.
