Inelihir kan mga kongresista bilang bagong Speaker sa Kamara de Representantes kan Miyerkules si Isabela 6th District Representative Faustino “Bojie” Dy III.
Rinibayan niya sa pwesto si Leyte 1st District Representative Martin Romualdez, na nagbutas sa nasambitang posisyon.
Makalihis ianunsyar ni Romualdez an saiyang pagbutas sa pwesto bilang lider kan Kamara, ininomina ni Quezon City Rep. Ralph Tulfo, si Dy na gibohong Speaker kan kapulungan.
Warang nagkontra sa nominasyon asin wara man na ibang pangaran na inirekomenda sa binakanteng posisyon ni Romualdez.
Sa nangyaring botohan, 253 na kongresista an nagboto para ki Dy, 28 an nag-abstain asin warang negative votes.
Bago magin Speaker, saro si Dy sa mga Deputy Speaker sa irarom kan liderato ni Romualdez, bilang kinatawan kan Partido Federal ng Pilipinas (PFP).
An Partido Federal ng Pilipinas an political party ni Presidente Ferdinand “Bongbong” Marcos Jr., na pinsan ni Romualdez.
Sa saiyang pagbutas bilang Speaker, sinabi ni Romualdez na mababa sya sa pwesto nganing mairayo an kapulungan gikan sa mga alegasyong nin katiwalian na pigtatakod saiya.
