LEGAZPI CITY-Tinarget kan Iran an mga US radar asin air defense installations sa Gulf kan Martes, na nagserbing patanid sa Washington nin mas determinado asin makukusog na pag-atake mantang naglala an sitwasyon sa paagi kan pagulang sa mga daungan kan Saudi kan mga rebeldeng Houthi sa Yemen.
Sinabi kan Revolutionary Guard kan Iran na inatake asin pinugulan ninda an duwang “non-compliant oil tanker” na nagporbar na mag-agi sa Strait of Hormuz, na parte kan pagpupursige na higotan an kapit kaini sa importanteng daluyan kan tubog mantang liwat na nagsiklab an gera.
Kasunod kan pagkagadan kan dai mababa sa tulong militar na Amerikano kan nakaaging aldaw, naglansar an Estados Unidos nin sarong bagong yugto kan mga pag-atake laban sa Iran kan Lunes nin banggi na sinabi kaining “dinisenyo ngani orog pang paluyahon an kakayanan kan militar kan Iran na piggagamit sa pag-atake sa mga komersyal na barko” sa strait of hormuz.
Makalihis an pirang oras, sinabi kan Iranian army na tinarget kaini an mga asset kan Estados Unidos sa Kuwait asin Bahrain, kaiba an mga air defense systems, radar installations asin administrative buildings.
Nagpatanid man si US President Donald Trump na magbabayad an Iran nin dakul na beses para sa kada militar na Amerikano na nagadan, mantang sinabi man ni Iranian President Masoud Pezeshkian na an iriwal an nagin sarong ganap na gera.
Haros 100 miyembro kan serbisyo kan US an nairido poon Hulyo 7, susog sa Pentagon.
Mientras tanto, nagpatanid man an mga kaalyado kan Tehran sa Yemen, na mga rebeldeng Houthi, nin pagpapahewas kan gera, na inanunsyo na uulangan ninda an mga daungan kan Saudi.
