LEGAZPI CITY — Kinumpirma kan pamayuhan kan 903rd Infantry Brigade an pagbusol kan localized peace talk sa pagultanan kaini asin kan rebeldeng New People’s Army (NPA) na inisyatibo mismo kan mga suldados.
Naglalaom si Col. Fernando Trinidad, commanding officer kan 903rd Infantry Brigade na maipapadagos an orolay pangkatoninungan maski sa lokal na lebel sana.
Naghahagad man ini nin tabang sa mga stakeholders kasabay kan pag-engganyar na makisumaro an mga ahensya de gobyerno sa gigibuhong pakikipag-olay sa mga rebelde.
Segun digdi, iengganyaron man kaini an mga religious sector siring man an mga nasabing ahensya urog na dae man kayang maitao kan mga suldados an kadaklan sa kinakaipuhan kan mga ini na sa gobyerno mismo makukua.
Dugang pa kan opisyal, naheherak suboot ini sa mga ordinaryong miyembro kan NPA na iyong nadidifisilan sa mga bulod gayong an mga haralangkaw na opisyal an nakikinabang sa kwarta kan partido.
Sa huri, ipigduon ni Trinidad na nuarin man dae mauswag an probinsya kan Sorsogon hasta dae napapakaray an peace and order situation sa lugar.
