LEGAZPI CITY- Naging matrayumpo an isinagibo ngunian na aldaw nin International Coastal Clean-up Drive sa Brgy. Puro Legazpi City na pinangenotan kan Department of Environment and Natural Resources (DENR) .
Segun kay DENR Assistant Regional Director for Special Concern Adona San Diego sa intrevista kan Bombo Radyo Legazpi na pigsagibo an naunambitang aktibidad nganing maitaas an pampublikong kaaraman manungod sa proper waste disposal.
Pigbalehan an aktibidad nin nasa 33 na mga ahensya kan gobyerno asin kan Legazpi City Local Government Unit.
Pigtaram man kan opisyal na importante an arog kaining mga aktibidad nin huli ta nagsisirbe ining kabuhayan asin ekonomiya.
Dugang pa ni San Diego na sa paaging ini, naproprotihiran an marine ecosystem lalo na an marine life partikulamente sa mga sira asin pawikan na nakakakaon nin mga plastik na nagkakawsa sa pagkagadan kaini.
Nagmamawot an opisyal na mas papakusugon an kaaraman kan publiko manungod sa proper waste disposal tanganing matabangan an ahensya sa pagmantinir sa kalinigan kan mga kadagatan sa nasyon.
Pigtawan doon kaini na base sa saindang datos na mas dakol an mga basurang nakukuwa sa kadagatan makalihis kan bagyo mantang mga plastic sachet, food wrappers asin mga upos kan sigarilyo an klase nin mga basura na saindang kalimitan na nakukua sa mga kadagatan.
