Padagos na pigbeberipika ngonyan an mga bareta na an bagong deklarang interim Supreme Leader kan Iran na si Ayatollah Alireza Arafi an nagadan sa saro na namang airstrike, pirang minuto sana pagkatapos kan saiyang pormal na pagdesignar sa pwesto.
Enot kaini, pormal na pigdesignar si Ayatollah Arafi bilang miyembro kan temporary Leadership Council kan Iran kasunod kan pagkagadan ni Supreme Leader Ayatollah Ali Khamenei sa serye nin US-Israeli strikes.
Basado sa mga report kan state media antes an soboot bagong pag-atake, makakaiba kuta ni Arafi sinda President Masoud Pezeshkian asin Chief Justice Gholamhossein Mohseni Ejei nganing temporaryong mag-asumir kan mga mandato bilang Supreme Leader mantang dai pa nakapili nin kasalida an Assembly of Experts.
Katakod kan pagkagadan ni Khamenei, nagdeklara an nasyon nin 40 aldaw nin pagmondo.
Magkakahalo man an reaksyon sa Tehran; dakol an nagmondo asin nagkururahaw nin mga protesta laban sa Amerika asin Israel, mantang igwa man nin mga bareta nin mga sekretong selebrasyon kan nagkapirang mga residente.
Antes pa man an mga bareta kan suboot pagkagadan ni Arafi, makusog na kinondenar ni President Pezeshkian an paggadan sa saindang nagadan na Supreme Leader asin inapod ining declaration of war against Muslims.
Pighahalat pa an opisyal na kumpirmasyon gikan sa gobyerno kan Iran asin sa state media manungod sa tunay na sinapit ni Ayatollah Arafi pagkatapos kan napabaretang airstrike.
