Pigbubusol liwat ngonian kan legal camp ni dating Presidente Rodrigo Duterte an saiyang interim release makalihis na siya madismayo nin duwang beses mantang nasa detention sa The Hague, Netherlands.
Segun sa saiyang abogado na si Nicholas Kaufman, an dating presidente nagtitios nin malalang short-term memory loss sa ibong kan nagtetenir an saiyang long-term memory.
Nagsangat nin panibagong medical report an kampo ni Duterte nganing suportaran an saiyang kahagadan para sa temporaryong libertad.
Ini makalihis na ibasura kan korte an mga naenot na ebidensya dapit sa nagluluyang pisikal asin mental na kapasidad kan dating punong ehekutibo.
Segun sa abogado, nadidipisilan an dating presidente sa pagtao nin magkakanigong direktiba sa saiyang mga defense attorneys.
An report na ini ipinaluwas kasabay kan pormal na pagpoon kan hearing kan International Criminal Court (ICC) nganing madeterminaran kun isasalang sa paglilitis si Duterte huli sa mga kasong crimes against humanity na may kinaaraman sa saiyang kampanya kontra iligal na droga o war on drugs.
