LEGAZPI CITY—Sarong insidente nin kasulo an nairehistro sa sarong residential house sa Brgy. Gadgaron, Matnog, Sorsogon.
Segun ki Matnog BFP Officer in Charge SFO4 Rene Ariate, sa intrevista kan Bombo Radyo Legazpi, na igwa saindang nag-apod na may nangyayaring kasulo sa nasambitang lugar na kun saen tulos man na nirespondehan kan saindang opisina.
Pigtaram kan opisyal na an nasulo sarong residential house na gibo sa concrete na may light materials, asin may nagtetenir na sarong pamilya.
Dugang ni Ariate na saro sa mga pigtuturong kawsa kan kasulo iyo an electrical wiring.
Wara man na nairido sa insidente huli ta tulos man na nakaluwas an mga indibidwal na nasa laog kan harong, asin wara na man na nadamay na mga pagtaraid na kaharongan.
Mientrastanto, nagpagiromdom man an opisyal sa publiko na pagmangnohon an mga electrical wiring sa saindang harong na posibleng magkawsa nin kasulo para maibitaran an siring na insidente.
