LEGAZPI CITY — Posibleng madugangan pa an mga pangaran kan opsiyal sa iniluwas na narco-list kan Philippine Drug Enforcement Agency (PDEA) Bicol sa mga masunod na aldaw.
Ini an tinawang duon ni PDEA Bicol Director Christian Frivaldo sa isinagibong press briefing kasubanggi kun sain kadakol na opisyal sa rehiyon an napasabay sa listahan.
May mga mga dae pa kaya suboot nailista huli sa dae pa man naireport kun kaya dae man makapakampante an ibang imbwelto sa droga na dae sinda makakasabay sa listahan.
Segun ki Frivaldo, nag-agi sa matinding validation an listahan kun sain an mga nasabing opisyal an pwedesir na pusher, user, drug lord o protektor nin iligal na droga.
May mga nag-alma man na bako na sinda imbwelto sa iligal na droga huli sa may mga dokumento man siring kan sertipikasyon na mapatotoo digdi. Alagad segun sa direktor, dae man kayang patunayan kan papel na bako na imbwelto an sarong opisyal sa droga huli sa pwedesir na nagbalik ini sa iligal na aktibidad.
Dugang pa kan opisyal na maski validated an listahan, dae man pwedesir na kasuhan tulos an mga opisyal huli sa basado sa ley, kaipuhan na madakop sa akto na nagbabayolar an persona.
Kaipuhan man suboot na hanapon an tamang kaso kontra sa mga ini asin kun igwa man, dapat nakabase sa aktwal an isasangat na kaso.
Alagad segun ki Frivaldo, gigibuhon kan PDEA an makakaya kaini ngani na i-revalidate an listahan asin an iluluwas pang listahan.
