Posibleng magsakat pa an inflation kan nacion sa pagultangan kan 5.0 hanggang 6.0% ngunyan na 2026 huli sa halangkaw na presyo kan langis, kakulangan sa suplay nin pagkaon asin mga “second-round effects” na nagpapatindi sa paglangkaw kan presyo, segun sa sarong dating opisyal kan Bangko Sentral ng Pilipinas (BSP).
Segun ki GlobalSource Partners economist asin dating BSP deputy governor Diwa Guinigundo, naglalaog an Pilipinas sa mas delikadong yugto kan inflation, kun sain hali sa paramientras na supply shocks pasiring sa nagpapadagos na cycle kan inflation.
Nagsakat pa kaya sa 4.1% an inflation kan Marso, na mas halangkaw kumparar sa 2.4% kan Pebrero asin labi sa double digit man kan nakalihis na taon na nagpapahiwatig kan nagtitinding pressure sa presyo.
Inako kan Bangko Sentral ng Pilipinas an peligro asin ipigtaas an saindang projection para sa inflation ngunyan na taon hali sa 3.6% asin 3.2% pasiring sa 5.1% asin 3.8%.
Segun pa ki Guinigundo na an halangkaw na presyo kan langis sa pang kinaban na merkado, limitadong suplay nin pagkain sa lokal, asin second-round effects siring kan kahagadan na paglangkaw sa sweldo asin adjustments sa pamasahe asin utilities an nagbubusol sa padagos na pagrikas kan inflation.
Maaapektaran man suboot kaini an ekonomiya huli ta mababawasan an purchasing power kan mga namamanwaan.
Sa pagkakarkulo kan GlobalSource Partners, posibleng magluya sa 0.5–1.5 points an gross domestic product growth hali sa baseline na 5% kung magpapadagos an krisis.
