LEGAZPI CITY-Nag-lobo an inflation rate sa nacion sa bulan kan Pebrero huli sa paglangkaw kan gastos sa pagkakan, harong, asin kuryente.
Basado sa huring datos kan Philippine Statistics Authority (PSA), nagluluwas na nagsakat na 2.4% sa bulan kan Pebrero na pinakahalangkaw na rekord poon kan Enero kan nakalihis na taon.
Huli digdi, an average na inflation rate sa laog kan duwang bulan, nag-abot na sa 2.2%.
Mantang mas makaskas an pinakabagong rekord, piglalaoman kan Bangko sentral na mamantenir an 2.3 % sagkod 3.1 % siring man an mas hahaba na 2.6 % median estimate kan 14 ekonomista basado sa mga pag-aadal.
Susog sa mga state statisticians, an marikas na inflation poon 1.1 % sagkod 1.8 % hale sa konsumo kan mga pangenot na pagkakan asin inumon.
Kabale digdi an gastos sa pabahay, tubig, kuryente, gas asin iba pa na naka-ambag nin 10.6% sa inflation ngonian na bulan. Sinegundahan ini kan restaurant asin serbisyo sa akomodasyon na nakapagrehistro nin 4.4%.
Nagpatanid man an mga ekonomista na posible pang maglangkaw an inflation huli sa padagos na tensyon sa Middle East na nagpapahalangkaw sa presyo kan produktong petrolyo, na igwang epekto sa ekonomiya kan nacion.
