LEGAZPI CITY- Pormal ng matukaw bilang masunod na alkalde kan ciudad nin Legazpi si dating Congressman Alfredo Garbin Jr. sa Martes, Nobyembre 11.
Ini makalihis an nakatalaan na pag proklama saiya Lunes, kasunod kan nagin desisyon kan Korte Suprema na nagtataong pusog sa desisyon kan Comelec en bank na pagdiskwalipika ni Legazpi Mayor elect Geraldine Rosal.
Sa intrevista kan Bombo Radyo Legazpi ki Garbin, sinabi kaini na maski diit na panahon na sana siyang magseserbi bilang alkalde alagad bako ini ulang ngani na maipaotob an mga programang magtataong solusyon sa mga angat sa ciudad.
Paliwanag ni Garbin na kaibanan sa mga prayoridad niya an sektor kan salud asin edukasyon.
Katunayan igwa suboot na pondo na itatao sa Legazpi City Hospital ngani na maggamit sa pagtataong serbisyo sa mga nagtitios na mga pasyente.
Afuera digdi, magpapatindog man nin dugang na mga classrooms para sa elementarya asin sekondarya ngani na mapunuan an kakulangan sa classrooms kan mga eskwelagan sa bilog na ciudad.
Napag-araman na igwa na ngunyan na nagpapadagos na bidding asin pinaglalaoman na madudugangan pa nin nasa 80 classrooms sa masunod na taon.
Dugang pa ni Garbin na tututukan man an problema sa tubig asin suplay kan kuryente sa ciudad.
