LEGAZPI CITY- Nakipag koordinar na an lokal na gobierno kan Virac sa Philippine National Police Maritime Enforcement Team ngani na maaksyunan an problema sa illegal fishing activities sa lugar.
Segun ki Virac Mayor Samuel Laynes sa intrevista kan Bombo Radyo Legazpi na bako man hali sa Catanduanes an mga imbwelto sa iligal na pagsisira kundi mga taga ibang provincia.
Komon na bayolasyon kan mga ini an iligal na pagamit nin dinamita sa pagsisira.
Sinabi kan alkalde na dati ng nasugpo an kaparehong mga aktibidad kan nakalihis na mga taon alagad liwat na nagbabalik sa ngunyan.
Sa presente mas darakulang mga bangka na suboot an pigagamit kan mga suspek kaya mas madaling nakakadulag.
Aminado si Laynes na an kabuhayan kan mga lokal na parasisira sa island province an apektado huli ta nadadanyaran an mga yamang dagat sa lugar huli sa pagpapasabog kan mga suspek gamit an dinamita.
Katakod kaini, nangapudan an alkalde sa iba pang mga banwaan sa provincia na magtarabangan ngani na marikas na maaksyunan an problema huli ta apektado suboot kaini an kadaklan.
Mientras tanto, target na magkaigwa nin mas mahewasan na pagpapatrolya ngani na madakop an mga imbwelto sa illegal fishing activities.
