Nagsangat an prosecution panel kan International Criminal Court (ICC) nin ikaduwang updated list of evidence laban ki dating Presidente Rodrigo Duterte, segun sa ipigsugo kan Pre-Trial Chamber kan Pebrero 10, 2025.
Segun sa notification kan ICC, duwang panibagong items an idinagdag laban ki Duterte, alagad nagtetenir na confidential an annex huli ta igwa ining mga sensitibong impormasyon hale sa mga testigo.
Nag-abot an update pirang aldaw makalihis tugutan kan Pre-Trial Chamber an parehong prosekusyon asin depensa na magpresentar nin bagong ebidensya.
Marurumduman na si Duterte inarestar kan Marso 11, 2025, pag-abot niya hale sa Hong Kong, bilang parte kan imbestigasyon kan ICC sa saiyang pig-aapod na “war on drugs.”
Segun sa mandamiento kan ICC, si Duterte suboot an nagmukna, nagpondo, asin nag-armas kan mga death squad na imbuelto sa paggadan sa mga pigtutubodan na drug users asin dealers.
Dinara siya sa The Hague kan parehong aldaw asin naghampang sa korte sa paagi nin video link kan Marso 14.
Katakod kaini, pirang beses man na sinayumahan kan Pre-Trial Chamber an kahagadan kan depensa kan dating presidente para sa saiyang interim release.
Itinalaan man kan Pre-Trial Chamber an confirmation of charges hearing para ki Duterte sa Pebrero 23 sagkod 27, 2026 sa The Hague.
Digdi madesisyon kun igwa nin bastanteng ebidensya nganing ipagpadagos an kaso laban saiya.
An lakdang na ini parte kan padagos na imbestigasyon kan ICC sa mga alegasyon nin human rights violations durante kan pagtukaw ni Duterte bilang dating Alkalde asin Presidente kan Pilipinas.
 filed a second updated list of evidence against former President Rodrigo Duterte, as ordered by the Pre-Trial Chamber on February 10, 2025.){kind=link}